هيك حكالي اردوغان
اردوغان : سلامات يا معلم
انا : هلا عمي ، رنيت عليك ابو ماهر بدنا اسطوانة غاز لأنو قلاية البندوره على الغاز والاسطوانه خلصت .
اردوغان : عمى الدبب ولك انا رجب طيب اردوغان
انا : يا هلا وغلا ، يزم من وين جبت رقمي ؟
اردوغان : اسمع انا اخذت رقمك من لميس لأنو فيه كم شغله بدي توصلها للشعب الأردني على لساني
انا : تفضل سيدي
اردوغان : يا عودق
انا : هههههههه عودة عودة اسمي ، حتى سمتني جدتي أمينة على اسم ابوها
اردوغان : يا عودة انا بس دخلت على الفيس امبارح وشفت الشعب الأردني كيف متضامن معي حكيت لمرتي ولك يامره تعالي شوفي النشامى ، عزوتي الله يرضى عليهم ، بالله عليك وصللهم شكري واحكيلهم انا امي اردوتركيه وهما تربي زلم ، وبأقرب فرصة بدي اجي اكل منسف عندكم.
انا : مقصرين يا سيدي ، انت بترقّع منك زُلم، والله متنا خوف عليك ، بس نفسي اسألك ليش ما زبط الانقلاب ؟
اردوغان : لأنو الشعب بيعرف انو حملت تركيا على ظهري ، عد على ايدك شو عملت لتركيا : صنعنا أول دبابة وأول طيارة بدون طيار وأول قمر صناعي عسكري ، بنينا ٥١٠ مستشفيات و٨٩ مدرسة ، قبل لاستلم كان متوسط دخل الفرد 3.5 الأف دولار والان صار دخلو 10.5 الآف دولار ، كان ترتيب تركيا على العالم اقتصادياً 111 والان صار ترتيبها 16 ، استلمت البلد وصادراتها 23.5 مليار وضليت اباطح لما صارت صادراتها 153 مليار .
انا : وااااااااال ، وليش عملوا الانقلاب فعلاً انهم اولاد حرام
اردوغان : عودة بدون غلط بضلو اتراك ومحسوبين علينا
انا : ماشي بس انته مش مقصر معهم
اردوغان : لا وفيه شغلات ما بتنحكى على التلفون بس اشوفك بحكيلك كل شي ، هذا ياللي حكيته شعره من انجازاتي ياللي اعملتها لوطني تركيا .
انا : بتعرف بدي افتحلك قلبي وأطلعك على اسرار من الدوله عندنا
اردوغان : يا زلمه سولف وغلاة مرتي ما احكي لحد
انا : اجانى رئيس وزراء جديد اسمه هاني الملقي حلف بالله امبارح انو ما يرفع سعر رغيف الخبز وحكى انو بحبنا وهو ما راح يسرقنا وبدو يحاول يقنع المسؤولين انو ديروا بالكم على هالشعب حرام بكفي سرقة من جيبته ، يا الله ما أحسنه .
أردوغان : بتتخوث انته
انا : والله والله ما بكذب عليك ، أصلاً أجى على المؤسسة العسكرية وسأل مدير المؤسسة عن سعر علبة الطحينيه قد ما هو مسكين ، حتى اسأل هشام ابن خالتي كان هناك .
اردوغان : عودة أنا نعست بدي أنام ، سلم على الجميع .
انا : الله يسلمك ، وبالله عليك اذا بتشوف لميس احكيلها ترن علي ضروري لأنو ما معي رصيد على تركيا ، واحكيلها انو انا مش مرتبط مثل ما حكيتلها بس كنت بدي أثقل عليها شوي من تياستي .
عودة عياصرة
