كلب الهاسكي !
-ماما ليش صاحبي أحمد عنده سيارة ريموت كنترول و أنا ما عندي ..
– محمد في بالحياة ناس فقراء و ناس أغنياء و ناس عاديين زينا .. ربنا أعطى كل واحد حسب تقديره و جهده و تعبه .. بس في شغلة لازم تفهما انتا لما تروح تجيب سندويشة فلافل و توكلها طعمها بالنسبة الك ازكى بكثير من طعمها لما ياكلها واحد غني ..
*ماما طيب ….
-خلص يا ماما لازم ما نتذمر و نحكي الحمدلله على كل اشي عشان نعمة الله الي بايدك ما تروح و تقعد تتحسر
*ماما طيب نفسي ب سيارة ريموت كنترول حلم حياتي أجيبها ..
-حبيبي بحاول أجيبلك ياها عل راتب الجاي إن شاء الله .. إحكي إن شاء الله
* إن .. إن .. إن شاء الله
* كبرت على مبادئ الرضا و القناعة .. مش بس القناعة بما أملك ..
برضو القناعة انو كل الناس بالحقيقة متساويين .. مهما زادت أو نقصت مصاريهم و نفوذهم بس الأهم هو سعادتك من جوا .. و السعادة مش بحاجة ل مصاري حتى تعملها .. و السعادة اغلب الاغنياء ما بعرفوها لانو المصاري عمتهم عن الأمور الحلوة بالحياة ..
# يعني يا محمد هسا الي قاعد ب تشي تشي و بشرب ميلك شيك مثلنا أنا وياك قاعدين بالعجوزة من المغرب على أرجيلة وحدة و ريقنا نشف بس ما معنا نجيب ببسي ؟
* ههههههه يزم طيب في ناس ما معها تنصص على راس الأرجيلة شو رأيك ؟؟؟
# هو بالله تحل عني ترا قرفان حالي من فلسفتك .. هسا أنا بدي ببسي و بصير أسعد واحد بالدنيا معاك تجيبلي هل سعادة ؟؟
* ههههههه لا ما معاي .. بعدين مش لحالك قرفان ههه ……
يومها كانت أول مرة أحس فيها بإشي غريب .. كلام صاحبي أثر فيني بطريقة ما .. يعني برضو مش منطق انا مثل الي قاعد ب تشي تشي ههه و مش منطق برضو الي ما معاه ينصص أرجيلة مع صاحبه انو مبسوط مثلي .. يعني .. يعني .. كيف كل الناس مبسوطين نفس الاشي ؟ .. مستحيل ..
بس خلص لازم نحكي الحمدلله .. الحمدلله على كل شيء
مشيت الأيام و السنين بتمشي معها .. و متطلبات حياتي بتزيد و حاجاتي بتزيد .. و المصاري الي بحتاجها صارت تزيد كمان ..
* بابا ممكن طلب ؟ .. زيدلي المصروف شوي بالله عليك .. ولله انو بكون نفسي أشتري أحيانا زنجر .. فاهيتا .. أي اشي من هل اشياء بس ما معي ..
+ بابا ولله ما بحب أحرمك من اشي .. بس ولله ما معي .. مصروفك الي بتوخذه يا دوب مدبرلك ياه
* بابا مهو الي بتعطيني ياه يا دوب يوفي مواصلا ..
+ بصير تخرس و تنقلع من وجهي .. انا طول اليوم بشتغل مثل الحمار حتى أوفرلكو قرشين تعيشوا فيهم و انتا نازل تتذمر ..
* بابا ولله اسف .. خلص اعتبرني ما حكيت اشي .. اسف
مع كل حاجة صارت عندي صرت أعرف أسدها أسدها .. مثلا بطلت أكل بالجامعة كل يوم بس باليوم الخامس بشتري فاهيتا .. أما شو طعمها بطلع مممممم .. و الاشي الي ما بعرف أسده زي هيك .. صرت أنساه و أضل أفكر بمبادئ المساواة و العدل الداخلي بين الناس حتى لو كان ظاهرهم مختلف ..
بس تخرجت .. بس طلعت من باب الجامعة .. كان في حفرة عمقها عشرة كيلو دايما الخريجين كانو يحكولي عنها .. فكرت حالي بقدر أمشي من جنبها .. بس طلعت كبيرة كثير و زلقة و و وقعت ههه ..
فجأة صارت كل همومي الي لا تتعدى سندويشة الفاهيتا او التوب سايدر التركي تافهة ..تافهة كثير ..
صار لازم ألاقي شغل بالبلد الي ما فيها شغل .. صار ابوي ينظرلي نظرة الإزدراء .. أحيانا يهت علي بإني ساكن عنده و باكل من اكله بس يرجع معصب من الدوام ..
صرت أفكر بالشغل .. أصرف ع حالي ..
برضو بدي أتجوز خلص كبرت .. برضو لو تجوزت مش بدي بيت ! .. ولا أضل أدفع أجار عل فاضي ..
برضو .. برضو ..
برضو أنا لسا ما لقيت شغل
§ إنتا بدك تضلك تحكيلي ب قصة حياتك هاي لمتى يا محمد .. شريطك صارله بنعاد أربع سنين
* سناء .. سناء إسمعيني بس .. أنا بس ألاقي شغل رح أخذ قرض و أجي أخطبك .. أول إشي رح أعمله .. اسمعيني
§ محمد خلص أنا زهقت و قرفت .. يمكن .. يمكن لازم كل واحد فينا يشوف حياته .. مع سلامة ..
* بس أنا بحبك يا سناء .. وعدتيني تضلي معي طول الحياة .. تتذكري ؟؟
§ صحيح بحبك و وعدتك .. بس .. بس الحب و الوعد مش كل اشي .. الله معك محمد
….
يومها طلعت من دار خالتي ب عمان و مشيت .. مشيت ب ليلة شتوية مظلمة و باردة ما بعرف وين رايح و ليش بمشي .. بس كان نفسي أضل أمشي للأبد لأني بحس حالي بتقدم بحياتي الواقفة ..
مشيت و بلشت أفكر بالحياة .. و بالوجود .. أفكار و مشاعر مختلطة لدرجة بطلت أميز بينهم .. دموعي بلشت تنزل .. حاس وجهي تجمد .. ليش .. ليش ..
صحيت على صوت كلبين بصيحوا على بعض .. الكلب الأول كان كلب هاسكي جوا سور القصر .. وراه كان في خمس سيارات مرسيدس و جنبه بركة سباحة .. الكلب الثاني كان شلاتي أجرب داير بالشوارع .. الثنين بصيحوا على بعض .. الثنين كلاب بس فرق كبير بينهم .. طلعوا بهاي لحظة صحاب القصر و اخذوا الهاسكي و فاتوا فيه عل بيت و حضنوه و بوسوه و أعطوه سمكة ..
الكلب الأجرب ضل واقف يشاهد المنظر .. إجت عيني ب عين الكلب .. حسيت إنه أكثر مخلوق بالحياة بهمني .. لفيت و رجعت على بيت خالتي .. ضليت أفكر كثير بس دموعي وقفت ..
ضليت أفكر ب كلام أمي .. ب كلام شيخ الجامع عن القضاء و القدر .. ب كلام الزلمة المريض الي قعد جنبي بالباص و حكالي أهم اشي بالحياة الصحة ..
بس ما كان يهمني كل هل كلام .. كان نفسي أكون مثل كلب الهاسكي ..
مخلوق وُجد بهل حياة ب ظروف و حياة غنية بدون أي مجهود شخصي منه .. كان نفسي أكون إبن ملك .. أو ابن مدير شركة .. او طلعلي ورثة ملايين من عمي الي ما بعرفه .. كان نفسي أكون أحد هاي شخصيات
ليش الحياة بتعمل واحد ابن سويرس المصري و واحد ابن سالم محمد ..
قعدت بالصالون .. لقيت الكل نايم .. فتحت التلفزيون .. كان في فلم سوبر مان شغال ..
لفتني إشي مهم .. لقيت الأجوبة على كل أسئلتي بالفلم .. انا اصلا كنت غبي .. الجواب كان قدامي دايما و انا مش عارفه ..
الجواب كان حكمة الأدوار .
ليش مخرج الفلم عمل هل ممثل بطل الخير و عمل هل ممثل الشر المطلق .. ليش ؟
ببساطة عشان الفلم يزبط ..
بدون شخصية الخير و شخصية الشر ما رح يكون للفلم معنى .. تخيل لو كانت كل الشخصيات خيرة .. وين القصة وين الهدف وين الجمال
طيب لو عكس الأدوار .. طيب لو جاب ممثلين جداد .. طيب لو ما رضي هل ممثل يمثل الشخصية الشريرة ..
بالنهاية الفلم رح يكمل و رح يكون في شخصية خير و شخصية شر ..
و هيك الحياة ..
مهما تذمرت من دورك فيها و حسيته ضئيل .. لكنه مهم .. مهم عشان يكمل فلم الحياة ..
و رح تضل ناس تنولد كلب شوارع .. و ناس تنولد كلب هاسكي ..
