قصه قصيرة ساخرة
فنجان قهوة صباحي
نظرت الى زوجها وهو نائم شخيره متل مطحنة زعيتر (مطحنة اقمشه بالزرقاء) بعد عودته مساء من عمله المرهق رافضا العشاء والسهر راميا نفسه على سريره .
ارهقه العمل الاضافي ليستطيع تأمين متطلبات رمضان والعيد والمدارس.
وهي تشاهد فلما على التلفاز لفت انتباهها مشهد الزوجة التي قامت وحضرت فنجانين من القهوة لها ولزوجها وايقظته لتجلس معه جلسة صباحية رومنسية.
صباحا قررت ان تعمل مثلها……..
فعلا في الصباح قامت وجهزت القهوه وتوجهت لزوجها ورفعت الغطاء عنه وطلبت منه ان يقوم ليشرب القهوه معها.
طلب منها ان تتركه لينام ولو لوقت قصير فالتعب قد هده.
ولكنها اصرت ولبى دعوتها ..ولكسب الوقت وتعويض العشرة دقائق اجل حلاقة دقنه لليوم التالي.
جرى الحديث التالي:
اشتقنالك حبيبي معنا ومش معنا بطلنا نشوفك
شايفه الوضع اذا ما اعملت هيك ما رح نوكل
توكل على الله ما حد بموت من الجوع
حبيت احكيلك حبيبي وانتى جاي جيب معك قهوه لانها خلصت
وجرة الغاز ما رح تكفي لليوم .. وبدنا شوية خضره الثلاجة مصفره..وما ثقلنا عليك بطلبات المدرسه بس البنت بدها خياطة مريولها والولد بوطه بده خياطه .
ماشي المسا لما ارجع انشالله.
خليني اطلع بدري عالشغل ما معي اجرة الطريق لازم اروح مشي اليوم.
ماشي حبيبي طلب صغير حياتي اشحن خطي بدينار ما بدي اثقل عليك حتى اقدر اضل اطمأن عليك…
خلص الرجل فنجان القهوه ولبس وهو طالع استنى حبيبي اجهزلك كيس الزباله خدو بطريقك
ماشي ..حبيبتي الي طلب عندك
أأمرني حبيبي ممكن تبطلي تقلدي المسلسلات واتركيني انام ثاني مره
لاني رايح مش شايف الضو من النعس وكملتيها معي وعميتي ضووي…
بلا رومنسيه بلا بطيخ
انور مصاروه
