انـــــــــــــــداري
نفسي اعرف ليش إحنا كلما اتخذت الحكومة قرارا اعترضنا عليه وأقمنا الدنيا ولم نقعدها ونكلنا بالشباب والصبايا بالحكومة تنكيلا ..يعني مثلا شايفين حالنا افهم من الحكومة.
بدي اسأل سؤال لجميع من يعترض….. حد فيكم فاهم سالفة فرق أسعار المحروقات على فاتورة الكهرباء.؟..طبعا ولا حد فاهم من كل الشعب بس الحكومة فاهمه….
طيب يلاش هاي حد فيكم فاهم سالفة أسعار المحروقات وكيفية تسعيرها .؟. طبعا ولا حد فاهم. وأيضا ولا حد فاهم فرق التأمينات على فاتورة الكهرباء ولا المبلغ الثابت على فاتورة ألمي .بس الحكومة فاهمة… فلويش المداقرة القاضية…؟
طيب يا شاطرين حد فيكم فاهم الجملة التي قالتها الوزيرة وهي: (أما بخصوص أبخرة البنزين فهي محددة في القاعدة الفنية كضغط البخار وضغط البخار الجاف والقطارة المتبخرة المبنية على متطلبات المواصفات القياسية الأوروبية والدولية،
ولو سببت أبخرة البنزين خسائر للمستهلك لتكبد أصحاب المحطات خسائر كبيرة، أما رائحة البنزين فإنها تكون نتيجة عدم الاحتراق الكامل للوقود ما يؤدي إلى خروج بنزين غير محترق من عادم السيارة وزيادة استهلاك البنزين فيها.) انتهى الاقتباس وطبعا ولا حد فاهم شي لكن الوزيرة فاهمة.
بصراحة صعبه عليكم هاي الأسئلة ففيها كيمياء وفيزياء ورياضيات .. وتبخر وقصص طرمة فخليني اسالكم سؤال تاريخي … حد فيكم فاهم كيف طلع الحج مطيع من البلد.؟… طبعا ولا حد فاهم بس معالي الوزيرة بتحكي انو طلعته غلط)..يعني الحكومة فاهمة…
يا جماعة يلاش هاي كمان خليني استفسر منكم .. حد فيكم فاهم ليش الانتربول مش جايب اونكل وليد ..؟ طبعا ولا حد فاهم بس الحكومة فاهمه وبتحكي انو انجلترا دولة مؤسسات .لكن نحن دولة ضرايب ومحروقات.
ببالي سؤال اسأله .حد فيكم فاهم ليش المديونية بتزيد مع انو قاعدين بترفع كل شيء حتى نسددها..؟… طبعا مش فاهمين بس الحكومة فاهمة وعارفه …وما بدها تزعجنا بقصص فارغة.
صراحة إحنا ظالمين الحكومات الرشيدة وهي سهرانة ليل نهار على تشليحنا عفوا قصدي على رفاهيتنا …وإحنا نازلين طخ ومش عاجبنا شي ..ولا رح يعجبنا شي …وعاملين حالنا فاهمين كل شي .
لماذا نعترض .؟..مش عيب فوق تعب الحكومة وفهمها ان نعترض عليها ..وفوق سهرها والشغل اللي فوق رأسها نعترض طيب خلينا نفهم القصة وبعدين نعترض …
يا جماعة الخير وبعدين … نحن مصابون بالاختناق من تعدد التصريحات الحكومية حتى اصبحت بعض التصريحات اقولا خالدة مثل ما حدث في اهم قضية امنية ابان الحكومة الراحلة حين اطل علينا معالي وزير السعادة الأردني وقال ..فات وسكر الباب ورآه …طيب حد فاهم بشو سكر الباب .هو بالمفتاح هو بالزرفيل هو حط القشاطة ورآه..إحنا مش عارفين بس هو عارف .
ورغم ذلك ورغم الحكومة قالت إنها فآيته انتحاري بمحاربة الفساد … ليش ما شفنا ولا وزير نط من فوق جسر عبدون ؟..أنداري
