صوّر يا مصوّر / يوسف غيشان

صوّر يا مصوّر

قال الرجل لصاحبه:
– يا رجل كلشي إتغيّر….. كنت قبل كمّن سنة ادخل ع السوبرماركت ومعي 5دنانير ، أوخذ جاج ومرتديلا ونسكافيه وشيبس وشوكولاته ورز وسكر ..وارجع ع الدار وبعد فيه معي مصاري ….هلا صار الموضوع صعب ..بتفوت ع السوبرماركت ومعك خمسين دينار ع الأقل تاتجيب نفس الأغراض، وبترجع ع الدار ما معك شلن.
قال صاحب الرجل إندهاش:
– لكن يا رجل انته عن اي بلد بتحكي؟ .
– عن الأردن ..عن هون
– صحيح الأسعار ارتفعت في الأردن ، لكن ما عمرها كانت رخيصة زي ما تحكي …. بخمس دنانير بتوخذ جاج ومرتديلا ونسكافيه وشيبس وشوكولاته ورز وسكر ..وبترجع ع السدار وبعد معك مصاري …. تخنتها.
– لا ما تخنتها ..هالحكي صحيح ..
– طب كيف كنت توخذ هاي الأغراض بأقل من خمس دنانير؟؟…خذني ع قد عقلي ..وفهّمني.
– أقوللك؟؟….كنت أوخذها ببلاش .
– وليش هلاّ بطّلت تقدر؟؟
– لأنهم صاروا ايحطوا كاميرات مراقبة في المحلات!!
ترى …هل نحتاج الى كاميرات ، مثل كاميرات دائرة السير والدوائر الأخرى ، لكنها كاميرات تراقب كل من يهبش المال العام من فوق الأرض ومن تحتها.
بدون هذه الكاميرات التي تغطي مساحة الأردن ، ستظل قربة الميزانية مخزوقة، حتى لو كنا نطفو على بركة بترول مكرر خالص ، وجبالنا ذهب وصحارانا يورانيوم .
وتلولحي يا دالية
ghishan@gmail.com