خنشوف مالها!!

مقال الاحد 19-6-2016
النص الأصلي
خنشوف مالها!!
كنت أتقلّب ذات اليمين وذات الشمال أمام مروحة توزع الهواء بعدالة فريدة وتقوم بالمهام الموكولة إليها بإخلاص وأمانة..كنت مطمئناً مرتاحاً بان الفترة المتأرجحة ما بين الساعة الثالثة وصلاة العصر هي فترة آمنة، حيث ترتفع درجة الحرارة إلى منتصف الثلاثينات تنزل احتمالية الإزعاج فيها إلى الصفر..الا انه وكما دائماً خاب ظني بالتوقع…فقد أقضّ مضجعي تطبيل عنيف أشبه بالصفع على خذ الباب ..ارتديت “حفايتي” على عجل وانطلقت من قاع الدار باتجاه البوابة..الا انه وقتها كان قد نجح باقتحام “الخويّخة” الصغيرة..وقبل وصولي إليه بعدة أمتار صاح من بعيد :
– أبو يحيى : أربط مع محمد القاسم؟
– أنا وبترميش سريع وعيني اليمنى تفتح بصعوبة بسبب تراكم النعاس: تفضل حجي..
– أبو يحيى: إيه..لابس تي شيرت (النهضة) ونايم؟..لازم حقيتك تظلك مقرمز ليل نهار..السلام عليكم
– أنا: وعليكم السلام فوت جاي..
– بيده أكياس من عصير التمر الهندي والليمون أبو يحيى : أَربط مع محمد القاسم؟!..ولا كيف؟
– انأ أثناء تزريري القميص عن صدري: طيب فوت جاي..
– أبو يحيى: بديش..ها أربط؟؟
– أنا: تربط شو يا حجي عدم المؤاخذة..
– ابو يحيى: مع محمد القاسم..نوخذ باصه “سكارسه” ع عمان!!..نصلي 4 ركعات تراويح ونطلع سوا..وإذا بتحب بنحيّد ع خيمة مصطفى فغاغا بالطريق بنتناوش بكسة توت وبكسة “كعب الغزال” وبنقول يا رب…ها شو قلت أربط؟؟
– أنا: استغفر الله العظيم..لويش نروح؟..على مين بدك نروح؟!!.
– أبو يحيى: نطمّن ع الحكومة..خنشوف مالها…لا تكون مريضة الله لا يسمح..متضايقة!! مسوية عملية زايدة!! مرارة !! تنظيفات!!…متهاوشة هي و حدا!! …اولادها خامّين عليها!!..خنشوف مالها..بهالأيام الفضيلة!
– أنا: شو بتهذرب خالي..مين هي؟
– أبو يحيى: الحكومة يزم… من يوم ما حلفوا اليمين هظاك وجه الضيف..لا صرحوا لا حكوا لا طلعوا ع الإعلام!!…يعني زي اللي بيعقد العقد وبرجعش ع خطيبته…يا مريض يا زعلان..يا بده يترك..ها أربط؟
– انا: أربط!..
– أبو يحيى: هسع بربط…سلام عليكم..طاااااخ ..أغلق “الخويخة” خلفه…

احمد حسن الزعبي
ahmedalzoubi@hotmail.com