حوار مع دجاجة معتصمة

مقال الثلاثاء 13-3-2018
النص الأصلي
حوار مع دجاجة معتصمة
بخطوة ذكية نظّم المزارعون قبل أيام اعتصاماً نوعياً احضروا معهم حيواناتهم وبهائمهم أمام مجلس النواب لتعبّر هذه الكائنات عن رفضها للضريبة الجائرة التي أقرتها الحكومة عليها، ولتنتفض ضد عجز وضعف المجلس النيابي الذي أصبح يقوم بعمل “السكرتاريا” للحكومة لا الرقابة عليها والدفاع عن مصالح الناس..تخيّلت مذيعاً يتبع لأحد القنوات الفضائية يتسلّق بكم “ديانا” ويمدّ ميكرفونه تجاه احد الأقفاص..
– المذيع: نتعرّف عليك؟
– الجاجة: أختك الجاجة..
– المذيع: ليش جايين هون؟
– الجاجة: أجينا نوقّف مع أصحابنا المزارعين ونتضامن معهم بلكي حدا سمعنا أو شعر بحالنا..
– المذيع: بفهم من كلامك أخت جاجة انه تضررّتم من رفع الأسعار والضرائب على القطاع الزراعي؟
– الجاجة: قال تصررنا ، التعن أبو سنسفيلنا الأولاني..الشعير يا الله يكفي لخمسة الشهر،عندي صيصان ومصاريف خمّ ..خليها على الله..ومطلوب مني أبيض بيضتين باليوم..طيب أنا قدرتي بيضة والجمعة عطلة منين نبيض بيضتين..إذا إحنا الجاج مساكين الله احتجينا على رفع الأسعار و”قاقينا” تا قلنا كافي.. مش عارف عنكو ؟.
– المذيع: طيب ليش أنت وصاحباتك الجاجات اجيتوا هون..ليش ما حضروا الديوك يدافعوا عنكم؟
– الدجاجة: هو في ظل ديوك يا زلمة هسع بسردك ع وجهك بقفا جناحي..الله وكيلك الله بيطلع حسّه يا بيقصّوه يا بيسجنوه يا بيشتروه..
– المذيع: طيب لو طلبوا يقعدوا معكم صندوق النقد الدولي بتوافقوا تقعدوا معهم؟
– الجاجة: أولاّ ما بنوافق ، ثانياً..مش رايحين يقعدوا معنا..صندوق النقد الدولي بيقعد مع الخرفان بس.
– المذيع: طيب ماذا عن باقي الثروة الحيوانية المعتصمة أمام مجلس النواب؟..
– الدجاجة: نفس المعاناة الله وكيلك، وكفصيلة الدجاج إحنا لسه أشوى من غيرنا..الله يعين الحلال ،الغنم والعنز والبقر..يعني كيس التبن صار يقسموه ع ثلاث وجبات مشان يكفيهم وكلّه قاعد بماعي من الجوع زى ما أنت سامع..
– المذيع: ما رأيك بمجلس النواب؟
– الدجاجة: مجلس شو؟؟ هسّع بنص صباحك !!..لو أنه مجلس عن حق وحقيق كان ما تركنا “خمامنا” وطلعنا ، كان ما جينا نعتصم عشان “شعير عيشنا” ..الحق مش عليهم بس..الحق ع “البولويبيف”.
– المذيع: بتحبّي تتوجهي رسالة للمسؤولين ؟
– الدجاجة: بحبّ أقول لمسؤولين البلد…يلــ…يســ …يفـ…..غطيني يا كرمة العلي.

احمد حسن الزعبي
ahmedalzoubi@hotmail.com

اظهر المزيد

مقالات ذات صلة

‫3 تعليقات

  1. انا بفوت ع الموقع بس عشان اقرأ مقال الاستاذ احمد بس الاعلانات كثير مزعجه ما معي مصاري اشتري مكيف و لا سامسونج ٨ خلوني اقرأ المقال ع رواق ودمتم سالمين

    1. اذا بتفتح الموقع من الكمبيوتر على متصفح كروم او فايرفوكس
      في اضافة اسمها adblock plus
      ثبّتها على المتصفح وبعدها مش رح تشوف ولااعلان لا على هذا الموقع ولا غيره
      تحياتي

  2. حوار رائع مدهش للاخت الجاجة .. للعلم فقط من ناحية علمية الدجاجة الانثى هي التي تحدد الجنس وليس الديك فلا تستهينوا بقدراتها

اترك رداً

زر الذهاب إلى الأعلى