جلسة اعادة تعريف علاقة مواطن بالدولة
رامي علاونة
على اثر اعلان الحكومة الكاراكوزية عن نيتها إعادة تعريف علاقة المواطن الكاراكوزي بالدولة، قامت الحكومة باستحداث هيئة مستقلة بالتنسيق مع العديد من الوزارات المعنية والجهات المانحة بهدف اعادة صياغة وتعريف هذه العلاقة، وقامت بتعيين خبراء ومختصين (من الابناء والقرايب والاصحاب، كالعادة) في هذه الهيئة للعمل على اعادة ‘تعديل’ العلاقة المايلة بأدوات متعددة منها الخطاب الاعلامي الجماهيري والمنصات الالكترونية والحوارات المباشرة والجلسات الفردية مع المواطنيين.
الحوار التالي مقتطف من جلسة اعادة تعريف اجراها أحد الخبراء مع أحد المواطنين المعروفين بعلاقتهم القائمة على الشك وعدم الثقة مع الدولة:
– اسمك؟
– عوض
– عمرك؟
– حوالي ١٠ سنوات
– بتمزح؟
– لا، بس ما بحسب اللي عشته في البلد.
– طيب پليز خليك جدي، واحكيلنا عن علاقتك بالدولة؟
– شو هي ‘الدولة’؟
– انت هون عشان تجاوب … مش مسموح لك تسأل.
– عفوا، شو كان السؤال؟
– حدد علاقتك بالدولة.
– أي دولة؟ الي علاقات بأربع، خمس دول.
– دولتك، اللي انولدت وعشت فيها.
– يعني المقصود بالدولة ‘الأرض’؟
– قلنالك انت هون بتجاوب بس، پليز ما تسأل.
– ماشي، ماشي. شو كان السؤال؟
– شو هي طبيعة علاقتك بالدولة؟
– قصدك علاقتي بالمؤسسات الحكومية؟
– قلنالك ما تسأل… انت بس بتجاوب.
– اوكي، بس شو كان السؤال؟
– بعدين معك؟ كل شوي شو كان السؤال؟!
– ما انت ما قلت لي اي دولة.
– الدولة اللي بتحمل جنسيتها.
– يعني المقصود بالدولة السلطة المانحة للهوية وجواز السفر وشهادة الميلاد والأوراق الرسمية؟
– بعدين معك؟! قلنالك انت هون بتجاوب بس.
– ماشي، ماشي، بوعدك ما أسأل، بس شو كان سؤالك؟
– قوم اطلع بَرّا، ونادي اللي بعدك … انت علاقتك بالدولة مستحيل ينعاد تعريفها!
