المتين في علم الاسفين… / م . بلال الشرمان

المتين في علم الاسفين …

مصطلح أسفنو : تستخدم هذه العبار لتدل على واقعة خوزقة تمت على شب غائب او مجموعة من الشباب من شب آخر او مجموعة شباب, ويقال ضربوا إسفين عند فلان, وفلان هو صاحب العمل الذي قادر على أن يضر الشخص المؤسفن (بفتح الفاء). وتنم هذه العبارة عن الكره المبطن من المؤسفن (بكسر الفاء) للمؤسفن (بفتح الفاء) وتصيده للموقف منذ زمن طويل
طبعا الاسافين انواع واشكال واحجام ومدى تاثيرها ومداها والقدرة التفجيرية لها
مثلا
1- الإسفين الموجه : ويتكون هذا الإسفين من رأس أحادي يكون موجّه إليك مباشرة من عدوّ لك بالشغل متربص فيك ومستنّي الفرصة وإنتا من شطارتك أعطيته الفرصة ففقعك إسفين محترم ، وهو الاسفين التقليدي العادي، ولا يحتاج الى جهد كبير، ويطلق من مسافة قصيرة
2-الاسفين المضاد غير المقصود : وهذا اسفين بيطلع بدون تخطيط ولا تحضير، وهو مضاد للنوع الاول ، يعني بيجي مديرك وبيسالك عن اسفين تم توجيهه ليك ، وعشان توضح الصوره وانة الموضوع وصل بطريقة خاطئة ، بتشرحلة الوضع واللي بكون صاحبك هو سبب خراب الشغل ، طبعا انت مش عارف مين هو اللي اسفنك ومديرك بيعرف الصح ، فبجلد صاحب الاسفين من النوع الاول انذار او خازوق
3- الإسفين الجماعي : وهذا الاسفين يحتاج الى جهد وعمل جماعي ، حيث يقوم مجموعة من الشباب الطيبة باسفنتك عند مدير او اكثر من مدير ، وهذا من اقوى الاسافين ويحتاج الى خبرة ودراية ومهاره عند التوجية
4- إسفين متعدد الاتجاهات : وهذا إسفين بتضربو عند مديرك وإنتا قاصد فيه- والنية بالقلب والله اعلم بالنوايا- شخص معين وإنو ما بحافظ على مصلحة الشغل وإنو ضد مبادئ الإدارة وبالجملة بتلطشلك خمس ست موظفين بالمعيّة مش عاجبينك وشايف إنهم ممكن يضرّوك، وهذا اسفين يحتاج الى ذكاء وتخطيط وقدره على متابعة الشباب
5- إسفين الرحمة : وهو إسفين نادر تطلقه لما تشوف صاحبك تعبان من الشغل ومش عاجبه الشغل ، والموظفين بيعطوه شغل كتيير فوق طاقته والأخ ممكن من الضغط يروح فيها…فبتروح حضرتك عند المدير وبتفقعه اسفين بالعظم لصاحبك وبتظلك تهوي للمدير عليه حتى ينعجق المدير ويجلدة مجموعة من الانذارات الانشطارية ويكحشو وهيك بتكون إنتا أطلقت عليه رصاصة الرحمة وخليته يقعد بالبيت معزز مكرم…
6- الاسفين غير المباشر : وهو من أقل الاسافين فاعلية يصدر من واحد قرفان زهقان عندو مبدأ علي وعلى أعدائي وبروح على المدير وبدال صباح الخير بحكيلو: ‘إنتا لو بتضب موظفينك بدل ما إنك قاعد ورا الكرسي، يزم شوف شو اللي بصير بالشغل وبتصير تسلخ شمال يمين وإنتا مو عارف ليش أو مين بس كل هدفك تفش غلك وطبعاً ما تتوقع الشباب يتركوك ، بعدها لإنك لطشت الكل وما إلك صاحب…
7-الاسفين العكسي : وهو من أغبى الأسافين ويصعب السيطرة علية ، يصدر من إنسان غبي تافه معوق طافي رايح يدق صاحبه إسفين بلاقي حالو إنه دق بحاله إسفين!!! مثلا بتحكي للمدير: ‘ترى خالد طول نهارو بدخّن بالشركة (وطبعاً الدخان بالشركة ممنوع) والمشكلة إنّو دايماً بتسلبط عليّ وبدخن من بكيتي
8-إسفين طويل المدى : والله يجيرنا منة هذا بالذات ويحتاج الى استعمال مضادات الاسافين لفترات طويلة ، وهذا الإسفين لا يطلقه إلا واحد خبيث وبكون على دفعات وقليل الجرعة بتضلك تزت أسافين صغيرة ومع الوقت بتتجمع عند مديرك إنو فلان الفلاني عليه مشاكل كثيرة ولازم نأدبو وهيك إنتا بتكون كإنك ما عملت إشي – تراكمات يعني – وهذا إسفين مضمون النجاح وقد أثبت فاعليته عند الشباب الطيبة ، ويحتاج الى صبر وتاني ، يعني شوي شوي
9- إسفين موجه بالأقمار الصناعيّة : وهذا الإسفين ما إلو علاج ولا مضاد حيوي ، بقلل صديقك وبحير دليلك ، لإنه إسفين من شخص واصل من فوق فالأفضل توخد حذرك من هيك أشخاص عشان تضمن حياة سعيدة هانئة بمكان شغلك ، كمان لازم تخفف من كمية العرط والتفاخر بشغلك قدامهم ، وانك زلمة دقيق بشغلك
10-الاسفين الخازوقي شديد الخوزقة : وهذا اعتذر عن الشرح عنة بسبب قساوتة واحتواءة على سواليف طرما

وللوقاية من الاسافين عليك اتباع الخطوات التالية :
* عليك بتناول الكثير من فيتامين الوقاية (الواسطة) لإنها بتشكل جهاز ردع ضد المأسفنين
*عليك بالإكثار من الحذر والخبث والتحفظ….ممكن ذلك يخفف فقط ولو إنو البعض يشكّك في ذلك ويقول: وداوِها بالتي هي الداء…يعني أسفن فيه الصبح قبل ما يأسفن فيك المساء وكمان إمشي الحيط الحيط ودايماً إحكي حاضر ….ولا تحكي لأ….ومع ذلك برضه رح تتاسفن
*كل يوم صبّح على مديرك وإسألو: آه شو الأخبار؟ إن شاء الله ما في أولاد حلال حكولك شو حكينا عنك مبارح؟؟؟ كيف الاولاد ، بحاجة لاشي يا كبير ، مع ابتسامة يبين سقف حلقك فيها

مقالات ذات صلة
اظهر المزيد

اترك رداً

زر الذهاب إلى الأعلى