“شو ناقصك” عنوان حملة -كما يبدو- تنظمها الهيئة المستقلة للانتخاب، لتشجيع الشباب ممن هم فوق الـ 25 عاماً للترشح للانتخابات البلدية المزمع عقدها في شهر آب القادم.
بصراحة “صفنت” في السؤال: معقولة الهيئة مش عارفة شو ناقص الشباب عشان يترشحوا للانتخابات البلدية؟!
معقولة الهيئة مش عارفة حجم البطالة في قطاع الشباب؟!
معقولة الهيئة مش منتبهة للفقر المتزايد وتأخر سن الزواج نتيجة الاوضاع الاقتصادية بهمة حكوماتنا المتعاقبة وسياساتها؟!
معقولة الهيئة ما بتعرف عن قانون الانتخاب اللي بيعزز من نفوذ رأس المال وبيحرم أصحاب البرامج الانتخابية من أية فرص حقيقية للفوز في الانتخابات؟!
معقولة الهيئة ما سمعت بشراء الأصوات و”طرود الخير”؟!
معقولة الهيئة ما سمعت بصندوق البادية الوسطى في الانتخابات البرلمانية اللي مختفي لهسا ؟!
معقول الهيئة ما عرفت إنه أصلاً ممنوع الشباب وغير الشباب يترشحوا لمنصب أمين عمان؟!
معقول الهيئة ما عرفت بالقمع والاعتقالات والملاحقات لشباب الحراك ؟!
أعتقد إنه كان الأولى بالهيئة تسمي حملتها “شو مش ناقصك” أو تحط يافطة كبيرة على مراكز الترشح مكتوب عليها : “عزيزي الشاب .. أنت من كل عقلك جاي تترشح؟!”.
