حوار أردني صرف
حصل شاب أردني على جائزة التفوّق العلمي من جامعة أميركية لتصميمه برنامجا يطوّع الأجهزة الإلكترونية لتمييز اللهجة الأردنية صوتيا .
ويستطيع البرنامج التعرّف على اللهجة الأردنية خصّ نصّ بجميع الاختلافات في مخارج الحروف الصوتية ، ممّا يمهد الطريق لتطويع أنظمة الحاسوب والأجهزة الخلوية لاستخدامات شخصية وأساسية ، مثل خدمة الزبائن والاستعلامات وبرامج تعليم
المكفوفين .
ممكن مثلا أن أخاطب موبايلي ، بعد إضافة هذا البرنامج ، قائلا :
– قديش الساعة يا قديش ؟؟
فيقول لي : الساعة خمسة ونص يا دب !!
– مين حكى معي وأنا منغمد ؟؟
– حكت مريم ( أم خنانه ) وخالتك الجربا وابن عمتك المصدّي !
– وشو قلتلهم يا أبو (مذر بورد) مصنن ؟
– قلتلهم إيحلّوا عن(….) لأنك بتشوخر .
– أنا بشوخر يا لوح ؟
– وبتحكي كمان وإنته نايم ؟!!
– شو بحكي ؟
– كنت بتقول : باعوها مفروشة
– وشو كمان
– كنت بتغلط ع الحكومة !!
– مش معقول أنا بموت في الحكومة !
– إنته بتموت من الحكومة … عالاقل هيك بتحلم !!
– أنا ؟؟؟؟؟
– مش إنته بس ……..!!
– سمعني حدا غيرك ، وأنا بحكي ؟؟
– أنا بكفي .. ما كلّ شي مسجل حتى وأنا طافي !!
– صحيح إنك طافي
– إنته الطافي ع شبر ميّه
– الحق مو عليك .. الحقّ ع الطالب الأردني اللّي خلاّك تصير تفهم !!
– أنا بفهم ؟؟؟… أشكالك اللّي بفهموا
– سد بوزك والله لو أني بس كمّلت حقك للتاجر ودافع حق البطاقة .. كنت خلعتك بالسهلة ورميتك باللاصة!
من كتابي(لماذا تركت الحمار وجيدا)الصادر عام2008